नवरदेव लापता: शादी से पहले का रोमहर्षक रहस्य, दोनों ही पुलिसकर्मी

बोहल्यावर चढण्याच्या काही तास पूर्वी पोलीस कर्मचारी असलेला नवरदेव चक्क पसार झाला. नांदेड जिल्ह्यातील ही घटना आहे. हा नवरदेव लग्नाच्या आदल्या दिवशी वऱ्हाड घेऊन वधूच्या घरी पोहचला. हळदीच्या कार्यक्रमात रात्री नवरदेवाने नवरीसोबत डीजेवर मनसोक्त डान्स देखील केला, पण लग्नाच्या काही तासापूर्वीच भलतच घडलं. बोहल्यावर चढण्यापूर्वीच नवरदेव सकाळी बेपत्ता झाला. विशेष म्हणजे वर आणि वधू हे दोघेही पोलीस दलात कार्यरत आहेत. या प्रकरणी किनवट पोलीसांनी मीसिंग दाखल करत बेपत्ता झालेल्या योगेश दत्ता घुगे या नवरदेवाचा शोध सुरु केलाय. योगेश दत्ता घुगे हा किनवट तालुक्यातील नागेशवाडी येथील रहिवासी आहे. तर मुलगी ही तालुक्यातील मदनापूर येथे राहत होते. दोघेजन विदर्भातील चंद्रपूर जिल्हा पोलीस दलात शिपाईपदी कार्यरत आहेत. त्या ठिकाणी त्यांची ओळख झाली. वर्ष भरापूर्वी दोन्ही कुटुंबांनी आपसात चर्चा करून लग्न ठरविले. मंगळवारी 3 फेब्रुवारी रोजी सकाळी ११.५४ वाजता किनवटच्या मदनापूर येथे वधूमंडपी त्या पोलीस उपवधू-वराचा विवाह थाटात संपन्न होणार होता. सोमवारी मांडव तसेच हळदीचा कार्यक्रम आयोजित करण्यात आला होता. वऱ्हाडी मंडळी घेऊन नवरदेव हा नवरीच्या घरी गेला. यावेळी हळदीच्या कार्यक्रमात रात्री एक वाजेपर्यंत नवरी नवरदेवाने एकत्र डान्सदेखील केला. रात्री उशिरा सर्व वऱ्हाडी झोपी गेले. इकडे लग्नघरात विवाहाची जय्यत तयारी सुरू होती. मात्र मंगळवारी पहाटे नियोजित वर बोहल्यावर चढण्यापूर्वीच बेपत्ता झाला. सकाळी नातेवाईक दत्ता कुठे आहे अस एकमेकांना विचारणा करत होते, मात्र तो कुठे गेला हे कोणालाच माहिती नव्हत. नातेवाईकांनी अनेक वेळा फोन लावण्याचा प्रयत्न केला पण मोबाईल बंद येतं असल्याने धाकधूक वाढली. इकडे वधूला नवरदेव बेपत्ता झाल्याची माहिती समजताच धक्का बसला. नातेवाईकांनी शोधाशोध करूनही त्याचा सुगावा न लागल्याने अखेर कुटुंबियांनी किनवट पोलिस ठाणे गाठत वर बेपत्ता झाल्याची फिर्याद दाखल केली. पोलिसांनी मिसिंगची नोंद करून बेपत्ता असलेल्या नवरदेवाचा शोध सुरू केलाय. नवरदेव बेपत्ता होण्यामागचे कारण अद्याप समजू शकले नाही. मात्र विविध चर्चेला उधाण आलं होतं. या घटनेने किनवट तालुक्यात खळबळ उडाली आहे.