प्रेम-विवाद से दोस्त की धारदार चाकू से हत्या; 2 आरोपी गिरफ्तार

प्रेयसी ठरली कर्दनकाळ; बालमित्राचा निघृण खून घटनेनंतर काही तासांत पोलिसांनी परभणीतून उचलले दोन आरोपी वाळूज येथील लांजी रोड परिसरात बुधवारी रात्री मैत्रीच्या नात्याला काळिमा फासणारी घटना घडली. लहानपणापासून सोबत वाढलेल्या जिवलग मित्रानेच २२ वर्षीय तरुणाला धारदार चाकूने भोसकून त्याचा खून केला. प्रेमप्रकरणातून निर्माण झालेल्या वैमनस्यामुळे घडलेल्या या घटनेनंतर परिसरात मोठी खळबळ उडाली असून, वाळूज पोलिसांनी अवघ्या काही तासांत आरोपींना परभणी शहरातून अटक केली. वाळूज-लांजी रोड येथील शिवराई स्मशानभूमीसमोच्या गल्लीत राहणारा प्रथमेश प्रभाकर गायकवाड हा बुधवारी रात्री जेवण करून बाहेर गेला. गल्लीतील सुजित देवघाटोळे आणि विकास मनाळ या मित्रांसोबत तो लांजी रोडवरील बंद दुकानासमोर गप्पा मारत होता. दरम्यान, रितेश विजय नरवडे आणि त्याचा साथीदार प्रदीप सुकासे हे दुचाकीवर आले. रितेश काही काळ प्रथमेशसोबत बोलला. अचानक त्याने धारदार चाकू काढून प्रथमेशच्या बरगडीत भोसकले. प्रथमेश रक्ताच्या थारोळ्यात कोसळला. चाकूचा धाक दाखवत साथीदारासह रितेशने दुचाकीवरून पलायन केले. सुजित व विकास यांनी धावत जाऊन प्रथमेशचे वडील प्रभाकर यांना बोलावून आणले. प्रथमेशला तातडीने १०८ रुग्णवाहिका चालक राजू रोकडे यांच्या मदतीने घाटी रुग्णालयात दाखल केले. डॉक्टरांनी तपासून त्याला मृत घोषित केले. प्रभाकर गायकवाड यांनी दिलेल्या फिर्यादीवरून वाळूज पोलिस ठाण्यात गुन्हा दाखल करण्यात आला आहे.