शरद पवार और भीमराव आंबेडकर एक साथ, महाराष्ट्र की राजनीति में नया संकेत

शरद पवार और प्रकाश आंबेडकर यांच्यातील राजकीय संघर्ष हा काही नवीन नाही. गेल्या अनेक वर्षांपासून हे दोघे नेते परस्परविरोधी भूमिकांमुळे चर्चेत राहिले आहेत. मात्र, अकोल्यातील एका कार्यक्रमात वंचित बहुजन आघाडीचे नेते प्रकाश आंबेडकर यांचे लहान बंधू भीमराव आंबेडकर आणि राष्ट्रवादी काँग्रेस (शरद पवार गटाचे) प्रमुख शरद पवार हे एकाच मंचावर दिसल्याने राजकीय वर्तुळात नवी चर्चा रंगू लागली आहे. हे जरी राजकीय व्यासपीठ नसले तरी, या दोन नेत्यांच्या उपस्थितीमुळे महाराष्ट्रातील आगामी राजकीय समीकरणांबाबत कयास बांधले जात आहेत. अकोल्यातील डॉ. बाबासाहेब आंबेडकर उत्कर्ष प्रतिष्ठानच्या वतीने आयोजित या कार्यक्रमात शरद पवार यांच्या हस्ते पत्रकारिता महाविद्यालाची इमारत, डॉ. बाबासाहेब आंबेडकरांचा 30 फूट उंच पुतळा, तसेच 24 तास फडकणाऱ्या राष्ट्रध्वजाचे उद्घाटन करण्यात आले. या कार्यक्रमात शरद पवार आणि भीमराव आंबेडकर एकत्र मंचावर दिसले, आणि त्यानंतर राजकीय चर्चांना ऊत आला. मात्र, माध्यमांशी बोलताना भीमराव आंबेडकर यांनी या सर्व चर्चांना पूर्णविराम दिला आहे. हा कार्यक्रम पूर्णपणे सामाजिक आणि शैक्षणिक स्वरूपाचा होता. यात कोणतेही राजकीय समीकरण किंवा राजकीय संदेश शोधण्याचे काही कारण नाही.