अकोला गैस एजेंसी के बाहर भारी भीड़, गैस सिलेंडर की तंगी से लोग परेशान

अकोला शहरातील जुने शहर परिसरातील राजेश्वर गॅस एजन्सीसमोर सध्या नागरिकांचा प्रचंड संताप पाहायला मिळत आहे. गेल्या अनेक दिवसांपासून गॅस सिलेंडरचे बुकिंग करूनही ग्राहकांना एजन्सीच्या वारंवार चकरा माराव्या लागत आहेत. गॅस मिळत नसल्याने नागरिकांना तासन्तास लांबच लांब रांगेत उभे राहावे लागत आहे. विशेष म्हणजे एजन्सीवर येणाऱ्या वृद्ध नागरिकांसाठी बसण्याची किंवा पिण्याच्या पाण्याची कोणतीही व्यवस्था करण्यात आलेली नाही. त्यामुळे उन्हात उभे राहून नागरिकांची प्रचंड गैरसोय होत आहे. गॅस मिळत नसल्यामुळे अनेक कुटुंंबांचे स्वयंपाकाचे नियोजन विस्कळीत झाले आहे. परिस्‍थिती इतकी बिकट झाली आहे की काही कुटुंंबांनी पर्याय म्हणून पुन्हा घरगुती चुलीचा वापर सुरू केला आहे. दरम्यान, काही ग्राहकांनी गंभीर आरोप करत एजन्सीकडून बुकिंग असतानाही सिलेंडर इतर ग्राहकांना जास्त दराने विकले जात असल्याचा आरोप केला आहे. आंतरराष्ट्रीय स्तरावर सुरू असलेल्या युद्धामुळे गॅस पुरवठ्यावर परिणाम होत असल्याचे सांगितले जात असले तरी नागरिकांनी शासनाने तातडीने हस्तक्षेप करून गॅस सिलेंडरची टंचाई दूर करावी आणि सर्वसामान्यांना घरगुती गॅस उपलब्ध करून द्यावा, अशी जोरदार मागणी केली आहे.