सांगली जिल्ह्यातल्या नगरपरिषद नगरपंचायतीचे चित्र स्पष्ट,नगराध्यक्ष निवडणुकीत 41 तर नगरसेवका पदासाठी 594 जण रिंगणात.. सांगली जिल्ह्यातल्या सहा नगरपरिषद व दोन नगरपंचायतीसाठी निवडणूक पार पडत असून अर्ज माघारीच्या अखेरच्या दिवशी नगराध्यक्ष पदाच्या निवडणुकीतून 60 जणांनी माघार घेतली आहे,त्यामुळे 41 जण नगराध्यक्ष निवडणूकीच्या रिंगणात आहेत.तर नगरसेवक पदाच्या 181 जागेसाठी दाखल झालेल्या 1 हजार 678 अर्जंपैकी 1 हजार 93 जणांनी माघार घेतली आहे,त्यामुळे 594 जण रिंगणात आहेत. त्यामुळे आता नगरपरिषद नगरपंचायतीच्या निवडणुकांचे चित्र स्पष्ट झालेला आहे. ईश्वरपूर नगर परिषदेसाठी दुरंगी अशी लढत पार पडत आहे.महायुती विरुद्ध महाविकास आघाडी अशी लढत या ठिकाणी होणार आहे.जयंत पाटलांच्या विरोधात महायुती आणि विरोधक या ठिकाणी एकवटले आहेत. आष्टा नगरपालिकेसाठी देखील महायुती विरुद्ध महाविकास आघाडी अशी लढत होत आहे. पलूस नगर परिषदेसाठी तिरंगी लढत होत असून या ठिकाणी महायुतीमध्ये बिघाडी झाली आहे.भाजपा स्वबळावर लढत आहे. राष्ट्रवादी अजित पवार स्वतंत्र लढत आहे. महाविकास आघाडी या ठिकाणी एकत्रित लढत आहे. तासगाव नगरपरिषदेसाठी चौरंगी लढत होणार आहे,या ठिकाणी राष्ट्रवादी शरद पवार गट आघाडी,भाजपा,राष्ट्रवादी अजित पवार गट आणि माजी खासदार संजयकाका पाटील यांच्या स्वाभिमानी विकास आघाडी अशी लढत होणार आहे. विटा नगर परिषदेसाठी तिरंगी लढत होत आहे.महायुतीमध्ये ही लढत होत आहे.यामुळे या ठिकाणी भाजपा,शिवसेना शिंदे आणि राष्ट्रवादी अजित पवार अशी तिरंगी लढत होणार आहे,काँग्रेस आणि राष्ट्रवादी या ठिकाणी लढत नाही. जत नगर परिषदेसाठी चौरंगी लढत होत आहे भाजपा स्वबळावर लढत आहे,शिवसेना शिंदे गट आणि राष्ट्रवादी अजित पवार गट देखील स्वतंत्र लढत आहे तर महाविकास आघाडी एकत्रित लढत आहे. आटपाडी नगर परिषदेसाठी दुरंगी लढत होत आहे.भाजपा स्वबळावर लढत आहे, शिवसेना शिंदे गट आणि स्थानिक आघाडी एकत्रित लढत आहे. शिराळा नगरपंचायतीसाठी महायुतीमध्ये बिघाडी झाली आहे.भाजप व शिवसेना शिंदे गट एकत्रित आघाडी करून लढत आहे,तर दुसऱ्या बाजूला राष्ट्रवादी शरद पवार गट आणि अजित पवार गट दोघे एकत्र येऊन लढत आहेत,या ठिकाणी काँग्रेसची भूमिका अद्याप स्पष्ट आहे.