पिंपरी चिंचवड महापालिकेची मालमत्ता कर थकबाकीदारांवर कठोर कारवाई सुरू झाली आहे. कर संकलन विभागाने आतापर्यंत शहरातील २७ मालमत्ता जप्त केल्या आहेत.अतिरिक्त आयुक्त प्रदीप जांभळे पाटील यांच्या निर्देशानुसार, वारंवार नोटीस देऊनही कर न भरणाऱ्या थकबाकीदारांवर जप्तीची कारवाई करण्यासाठी १८ विभागीय कार्यालयांमार्फत १८ पथके सक्रिय आहेत. ही मोहीम पुढील महिनाभर व्यापक स्वरूपात राबविण्यात येणार आहे. या कारवाईदरम्यान १२५ थकबाकीदारांनी तत्काळ कराचा भरणा करून कारवाई टाळली, तर काही मालमत्ताधारकांचे नळ कनेक्शनही खंडित करण्यात आले आहे. निवासी आणि बिगरनिवासी थकबाकीदारांवर ही कारवाई सुरू आहे.