तपोवनातील वृक्षतोडीबाबत नाशिक शहरातील पर्यावरणप्रेमींनी हरकती नोंदविल्या आहेत. दुसरीकडे नाशिक शहरात वृक्षतोड मात्र सुरूच आहे. या पार्श्वभूमीवर आज सर्व नाशिककर पर्यावरणप्रेमी नागरिकांतर्फे पर्यावरण मोर्चाचे आयोजन करण्यात आले आहे. या मोर्चात मनसेचे युवा नेते अमित ठाकरे देखील उपस्थित राहणार आहेत. सीबीएस परिसरातील हुतात्मा स्मारक येथून सकाळी ९ वाजता या मोर्चाला प्रारंभ होणार असून महापालिका मुख्यालय राजीव गांधी भवन येथे नेण्यात येणार आहे. हा मोर्चा पूर्णपणे शिस्तबद्ध पद्धतीने, केवळ झाडे व निसर्ग संवर्धन, गोदावरी व तिच्या उपनद्या, ब्रह्मगिरी, अंजनेरी तसेच प्राणी व पक्षी संवर्धन हा विषय अग्रस्थानी ठेवून काढण्यात येणार आहे. विविध विचारसरणीचे नागरिक, राजकीय पक्षांचे सदस्य, पदाधिकारी आणि सामान्य नागरिक पक्षीय झेंडे बाजूला ठेवून सहभागी होणार आहेत.