महाराष्ट्र राज्य माध्यमिक आणि उच्च माध्यमिक शिक्षण मंडळाच्या वतीने घेण्यात येणाऱ्या दहावी आणि बारावीच्या परीक्षांची तारीख जाहीर करण्यात आली असून तिची पूर्वतयारी सुरू करण्यात आली आहे. कॉपी करणाऱ्यांवर कडक कारवाई करण्याचे आदेश देण्यात आले असून त्या दृष्टीने यंदा कडक परिस्थिती असेल, असे संकेतही देण्यात आले आहेत. नाशिक जिल्ह्यात सुमारे २५० केंद्रांवर दहावी आणि बारावीच्या परीक्षा घेतल्या जातात. परीक्षा केंद्रावर सामूहिक कॉपी करताना आढळल्यास संबंधित परीक्षा केंद्राची मान्यता कायमस्वरूपी रद्द करण्यात येणार आहे. यंदा प्रथमच शाळेबाहेर ड्रोनचाही वापर करण्यात येणार आहे. दहावी-बारावीची परीक्षा कॉपीमुक्त होण्यासाठी यंदाही सरमिसळ पद्धत असणार आहे. गतवर्षी ज्या परीक्षा केंद्रांवर कॉपीचे प्रकार घडले, त्यांची मान्यता रद्द केली जाणार आहे. त्यावेळी सर्व केंद्रांवर सीसीटीव्ही कॅमेरे बसविणे वेळेत शक्य नव्हते. त्यामुळे पर्यवेक्षकांचे मोबाइल कॅमेरे सुरू करून त्या निगराणीखाली परीक्षा पार पडली होती. जिल्ह्यात दुर्गम भागातील काही परीक्षा केंद्र संवेदनशील आहेत. ज्या केंद्रांवर सातत्याने कॉपी केसेस होत असतात त्या केंद्रांना अतिसंवेदनशील केंद्रांच्या यादीत ठेवण्यात आले आहे. अशा केंद्रांबाहेर आता ड्रोनची नजर ठेवण्यात येणार आहे...