कोल्हापूर महानगरपालिका निवडणुकीसाठी राष्ट्रवादी काँग्रेस (शरद पवार गट), वंचित बहुजन आघाडी आणि आम आदमी पार्टी यांनी एकत्र येत राजर्षी शाहू आघाडीची औपचारिक घोषणा केली आहे. या तिन्ही पक्षांची संयुक्त पत्रकार परिषद पार पडली. यावेळी राष्ट्रवादी काँग्रेस (एसपी)चे जिल्हाध्यक्ष व्ही. बी. पाटील यांनी आघाडीची भूमिका स्पष्ट केली. यावेळी बोलताना व्ही. बी. पाटील यांनी, खासदारकी असो किंवा आमदारकी, आजवर सर्व निवडणुकांमध्ये आम्ही खांद्याला खांदा लावून लढलो. मात्र या महापालिका निवडणुकीत इंडिया आघाडीच्या वतीने एकतर्फी भूमिका घेतली गेली. त्यामुळे आता आम्ही आप आणि वंचित बहुजन आघाडीसोबत जाण्याचा निर्णय घेतला आहे. फक्त महापालिका नव्हे तर आगामी जिल्हा परिषद निवडणुकीतही हीच आघाडी एकत्र लढणार असल्याचं त्यांनी स्पष्ट केलं. त्याचबरोबर आज २१ उमेदवारांची यादी जाहीर करण्यात येणार असल्याची माहितीही दिली. जागा वाटपात राष्ट्रवादी काँग्रेस (एसपी)ला २५ जागा तर वंचित बहुजन आघाडी आणि इतर मित्र पक्षांना ३१ जागा असा फॉर्म्युला ठरवण्यात आला आहे. यावेळी व्हि. बी . पाटील यांनी काँग्रेस नेते सतेज पाटील यांचे नाव न घेता टीका केली. एका व्यक्तीमुळे इंडिया आघाडी चुकीच्या दिशेने जात असल्याचे नमूद केले.