छत्रपती संभाजीनगरमध्ये अमली पदार्थांविरोधात टास्क फोर्सने मोठी धडक कारवाई केली आहे. गेल्या चार दिवसांत दोन वेगवेगळ्या कारवायांमध्ये तब्बल ४ हजार ४०० नशेच्या गोळ्या आणि १३२ सिरपच्या बाटल्या जप्त करण्यात आल्या आहेत. या प्रकरणी कुख्यात ड्रग्ज माफिया ‘अंधा फिरोज’चा भाऊ सय्यद अझर आणि त्याचा नातेवाईक तौफिक रशीद अली या दोघांना पोलिसांनी अटक केली आहे. २३ मार्च रोजी पहिली कारवाई करत ट्रॅव्हल्सने सुरतहून नशेचा माल आणणाऱ्या सय्यद अझरला अटक करण्यात आली. त्याच्याकडून २ हजार गोळ्या आणि ११४ सिरपच्या बाटल्या जप्त करण्यात आल्या. तर २४ मार्च रोजी घाटी रुग्णालयासमोर दुसरी कारवाई करण्यात आली. यावेळी तौफिक रशीद अली याला ताब्यात घेऊन त्याच्याकडून २ हजार ४०० नशेच्या गोळ्या जप्त करण्यात आल्या.