माजी विरोधी पक्षनेते अंबादास दानवे यांची वाय प्लस पोलिस सुरक्षा काढून घेण्याचा निर्णय राज्य शासनाच्या गृह विभागाने घेतला आहे. यानुसार शुक्रवारी दानवे यांना देण्यात आलेली 'वाय प्लस एस्कॉर्ट' सुरक्षा मागे घेण्यात आली. विषेश म्हणजे त्यांचा विधानपरिषद सदस्यत्वाचा कालावधी ४ महिन्यांपूर्वीच संपला आहे. राज्य शासनाच्या गृह विभागाकडून याबाबत आदेश शुक्रवारी जारी करण्यात आले. त्या आदेशानुसार छत्रपती संभाजीनगर पोलिस आयुक्तालयाने पुढील कार्यवाही सुरू केली. दानवे यांच्याकडे आता विरोधी पक्षनेतेपद राहिले नाही. असे असताना त्यांच्याकडे सरकारी वाहन व पोलिस कर्मचारी सुरक्षा कायम होती. मात्र, शुक्रवारी अचानक त्यांच्या सुरक्षेसाठी तैनात पोलिसांना तत्काळ परत बोलावण्यात आले. गृह विभागाच्या आढाव्यानुसार व सुरक्षा पुनरावलोकन समितीच्या शिफारशीनुसार हा निर्णय घेण्यात आल्याचे सूत्रांनी सांगितले. सुरक्षा धोका मूल्यांकनात बदल झाल्याने ही कार्यवाही करण्यात आल्याचेही समजते. या निर्णयामुळे राजकीय वर्तुळात चर्चा सुरू आहे.