कानपुर में 'I Love Muhammad' बैनर पर उबाल: देशभर में आक्रोश

اتر پردیش کے کانپور میں عید میلاد النبی ﷺ کے موقع پر ’’آئی لو محمد‘‘ کے بینر لگانے پر مقدمہ درج کیے جانے کے خلاف ملک بھر کے مسلمانوں میں غم و غصہ بڑھتا جارہا ہے۔ اس واقعہ کے خلاف مختلف شہروں میں احتجاجی مظاہرے ہورہے ہیں اور اسی کے ساتھ ملک گیر سطح پر ’’آئی لو محمد‘‘ کے نام سے ایک نئی تحریک بھی شروع ہوچکی ہے۔اس تحریک کے اثرات ناندیڑ میں بھی نمایاں طور پر دیکھنے کو مل رہے ہیں۔ آج شہر کے کئی علاقوں میں مقامی نوجوانوں نے ’’آئی لو محمد ﷺ‘‘ کے بینر لگاکر اور دکانوں پر پوسٹر آویزاں کرکے پیغمبر اسلام حضرت محمد ﷺ سے اپنی عقیدت اور محبت کا اظہار کیا۔ نوجوانوں نے کانپور کے واقعے کی سخت مذمت کرتے ہوئے کہا کہ ایسے اقدامات مسلمانوں کے دینی جذبات کو مجروح کرنے والے ہیں۔قیوم پلاٹ علاقے کی تصاویر میں دیکھا جا سکتا ہے کہ سڑکوں کے کنارے اور عمارتوں پر بڑے پیمانے پر ’’آئی لو محمد ﷺ‘‘ کے بینر نصب کیے گئے ہیں۔ سوشل میڈیا پر بھی یہ مہم تیزی سے پھیل رہی ہے اور ہزاروں افراد اپنے پروفائلز اور پوسٹس میں ’’آئی لو محمد ﷺ‘‘ کے جملے استعمال کررہے ہیں۔مقامی معززین اور شہریوں کا کہنا ہے کہ یہ تحریک پرامن طور پر اپنے جذبات اور عقیدت کے اظہار کا ذریعہ ہے، جس کا مقصد دنیا کو یہ پیغام دینا ہے کہ مسلمان اپنی جان سے بڑھ کر حضور اکرم ﷺ سے محبت کرتے ہیں اور کسی بھی قسم کی توہین یا امتیازی سلوک برداشت نہیں کریں گے۔