जळगाव जिल्ह्यातून एक धक्कादायक प्रकार समोर आला आहे, चाळीसगाव तालुक्यातील तरवाडे येथील चौथ्या वर्गातील 9 वर्षांची मुलगी शाळेत गेल्यानंतर घरी न परतल्याने खळबळ उडाली आहे. ही मुलगी गेल्या तीन दिवसांपासून बेपत्ता असून नातेवाइकांसह पोलिसांकडून तिचा शोध युद्धपातळीवर सुरू आहे. सदर मुलगी शुक्रवारी सकाळी नेहमीप्रमाणे शाळेत गेली होती; मात्र सायंकाळपर्यंत ती घरात परतली नाही. कुटुंबीयांनी व नातेवाईकांनी सर्वत्र शोध घेतला, परंतु कोणताही ठोस सुगावा लागला नाही. या घटनेची माहिती पोलिसांना देण्यात आली. आमदारांनी तरवाडे येथील कुटुंसची भेट घेऊन परिस्थितीची माहिती घेतली आणि पोलिस प्रशासनाला तत्काळ तपास करण्याचे निर्देश दिले. गावातील स्थानिक नागरिक, नातेवाईक आणि पोलिसांच्याच्या संयुक्त पथाकडून शोधमोहीम राबवली जात आहे आणि विविध शक्यतांचा तपास केला जात आहे.