जळगाव शहरातील एमआयडीसी परिसरात मध्यरात्री गोळीबाराची घटना घडली असून या गोळीबाराच्या घटनेत दोन कामगार गोळी लागून जखमी झाले आहेत. सेक्टरजी परिसरात एका टपरीवर एका तरुणाचे टपरीवर आलेल्या कामगारांसोबत वाद झाले व या वादातून तरुणासोबत असलेल्या इतर तरुणांनी कामगारांना मारहाण करून बेछूट गोळीबार केल्याची माहिती आहे. दरम्यान घटनेनंतर जखमी कामगारांना तातडीने जिल्हा रुग्णालयात दाखल करण्यात आले असून गोळीबाराच्या घटनेमुळे जळगाव शहरात एकच खळबळ उडाली आहे. घटनेची माहिती मिळताच एमआयडीसी पोलिसांनी घटनास्थळी धाव घेत घटनास्थळाची पाहणी केली या पाहणी दरम्यान पोलिसांना सहा रिकामे काडतूस व एक जिवंत काडतूस आढळून आले असून कामगारांना मारहाण करून गोळीबार करणाऱ्या तरुणांचा पोलिसांकडून शोध सुरू आहे.