जळगावच्या निमखेडी येथे कौटुंबिक वादातून संतापलेल्या पतीने पत्नीची निर्घृण हत्या केल्याची धक्कादायक घटना घडली. दिपाली नितीन सोनवणे असे मयत महिलेचे नाव असून, या घटनेमुळे परिसरात एकच खळबळ उडाली आहे. दिपाली सोनवणे या पती नितीन विजय सोनवणे हे आपली दोन मुलं व एक मुलगी यांच्यासोबत निमखेडी गावात राहत होत्या. हातमजुरी करून उदरनिर्वाह करणाऱ्या नितीन सोनवणे यांचे पत्नीशी काही दिवसांपासून कौटुंबिक वाद सुरू होते. आज दुपारी पुन्हा वाद उफाळून आल्यानंतर संतापाच्या भरात त्यांनी लोखंडी विळ्याने पत्नीच्या मानेवर व पोटावर वार करून तिची हत्या केली. खून केल्यानंतर आरोपी नितीन सोनवणे हा स्वतःहून जळगाव तालुका पोलीस ठाण्यात हजर झाला. पोलिसांनी घटनास्थळी धाव घेत पंचनामा केला असून मृतदेह शासकीय वैद्यकीय महाविद्यालयात पाठविण्यात आला आहे. या प्रकरणी गुन्हा दाखल करण्याचे काम सुरू आहे.