Punjabi Girl Video Viral: సోషల్ మీడియాలో ఎప్పుడు ఏ వీడియో వైరల్ అవుతుందో చెప్పడం కష్టం.. ముఖ్యంగా డాన్స్ వీడియోలకు నెటిజన్ల నుంచి లభించే ఆదరణే వేరు.. తాజాగా పంజాబీ సంప్రదాయ దుస్తుల్లో ఒక యువతి చేసిన డాన్స్ వీడియో ప్రస్తుతం సోషల్ మీడియాలో విపరీతంగా ట్రెండ్ అవుతోంది. దీనిని చూసిన సోషల్ మీడియా వినియోగదారులు ఫిదా అవుతున్నారు. అయితే, ఈ వీడియో ఇంతలా వైరల్ అవ్వడానికి గల కారణాలేంటో ఇప్పుడు మనం తెలుసుకుందాం..

సాధారణంగా పంజాబీ డాన్స్ అనగానే ఉత్సాహం, ఎనర్జీ, కలర్‌ఫుల్ మూవ్స్ మనకు గుర్తుకొస్తాయి. ఈ వైరల్ వీడియోలోనూ సరిగ్గా అదే జరిగింది.. ఎరుపు రంగు పంజాబీ సూట్ (Red Suit) ధరించిన ఒక యువతి.. పంజాబీ పాటలకు వేసిన స్టెప్పులు చూసి నెటిజన్లు ఆశ్చర్యపోతున్నారు. ఆమె డాన్స్ మూవ్స్, బాడీ లాంగ్వేజ్, ఫేషియల్ ఎక్స్‌ప్రెషన్స్ పర్ఫెక్ట్‌గా ఉండటంతో ఈ వీడియో తక్కువ సమయంలోనే లక్షలాది మంది దృష్టిని ఆకర్షిస్తోంది..

ఆకట్టుకుంటున్న ఎక్స్‌ప్రెషన్స్..
ఈ వీడియోలోని యువతి డాన్స్ మాత్రమే కాదు.. ఆమె ముఖంలో కనిపిస్తున్న Expressions ప్రత్యేక ఆకర్షణగా నిలిచాయిగా భావించవచ్చు.. పాటలోని ప్రతి బీట్‌కు అనుగుణంగా ఆమె ఇచ్చిన ఎక్స్‌ప్రెషన్స్, వేసిన స్టెప్స్‌ చూసి నెటిజన్లు కామెంట్ల వర్షం కురిపిస్తున్నారు. సంప్రదాయ దుస్తులలో ఇంతటి ఎనర్జిటిక్ డాన్స్ చేయడం నిజంగా అద్భుతమని నెటిజన్స్‌ అంటున్నారు..

ఈ వీడియోను వివిధ సోషల్ మీడియా ఫ్లాట్‌ఫామ్స్‌లో వేలాది మంది షేర్ చేస్తున్నారు. రియల్ టాలెంట్ అంటే ఇదే.. చూపు తిప్పుకోలేకపోతున్నాం.. పంజాబీ సంస్కృతికి తగ్గట్టుగా చాలా అందంగా డాన్స్ చేసింది.. అంటూ నెటిజన్లు ప్రశంసల వర్షం కురిపిస్తున్నారు. ఈ వీడియోకు లైకులతో పాటు కామెంట్లు నిమిషాల్లోనే విపరీతంగా పెరిగిపోతున్నాయి.

Karimnagar School Holiday News: కరీంనగర్ జిల్లా వాసులకు, ముఖ్యంగా పాఠశాల విద్యార్థులు, వారి తల్లిదండ్రులకు అత్యంత ముఖ్యమైన వార్త.. గత కొన్ని రోజులుగా పడుతున్న కుండపోత వర్షాలతో జిల్లా తడిసిముద్దవుతోంది. వాగులతో పాటు వంకలు పొంగిపొర్లుతున్నాయి. రహదారులు జలమయమై పిల్లలను బడులకు పంపాలంటేనే తల్లిదండ్రుల గుండెలు చేతిలో పట్టుకోవాల్సిన పరిస్థితి నెలకొంది. ఈ ఆందోళనకర పరిస్థితులను, ప్రజల భయాందోళనలను జిల్లా యంత్రాంగం సకాలంలో గుర్తించింది.

రేపు పాఠశాలలకు సెలవు..
వర్ష తీవ్రతను దృష్టిలో ఉంచుకుని.. విద్యార్థుల రక్షణే ధ్యేయంగా కరీంనగర్ జిల్లా కలెక్టర్ చిత్రా మిశ్రా ప్రత్యేకమైన ఆదేశాలను జారీ చేశారు. కలెక్టర్ ఆదేశాల మేరకు జులై 31వ తేదీన జిల్లాలోని పాఠశాలలన్నింటికీ సెలవు ప్రకటిస్తున్నట్లు జిల్లా విద్యాశాఖాధికారి (DEO) చైతన్య జైనీ అధికారికంగా వెల్లడించారు.

ఈ నిర్ణయం జిల్లాలోని అన్ని ప్రభుత్వ, ప్రైవేటుతో పాటు ఎయిడెడ్ పాఠశాలల యాజమాన్యాలకు వర్తిస్తుందని DEO స్పష్టం చేశారు. చిన్నారి విద్యార్థులు వర్షంలో తడిసి అనారోగ్య సమస్యల బారిన పడకుండా.. ఏ విధమైన ప్రమాదాలకు గురికాకుండా చూసేందుకు ఈ నిర్ణయం తీసుకున్నట్లు అధికారులు తెలిపారు..

సాధారణంగా సెలవు అనగానే చదువు వెనుకబడిపోతుందేమోనన్న చింత ఉపాధ్యాయుల్లో, తల్లిదండ్రుల్లో వ్యక్తమవుతుంటుంది. కానీ.. జిల్లా విద్యాశాఖ దీనికి కూడా సరైన ప్రత్యామ్నాయాన్ని సిద్ధం చేసిన్నట్లు తెలుస్తోంది.. జులై 31న పనిదినాన్ని భర్తీ చేయడానికి రాబోయే ఆగస్టు 8న పాఠశాలలను యథావిధిగా నిర్వహించనున్నట్లు DEO చైతన్య జైనీ తెలిపారు. దీనివల్ల విద్యార్థుల విద్యాసంవత్సర ప్రణాళికకు ఎలాంటి నష్టం కలగదని ఆయన పేర్కొన్నారు.

Thalliki Vandanam Scheme: విద్యా వ్యవస్థ బలోపేతం.. డ్రాపౌట్లు నివారించడానికి ఆంధ్రప్రదేశ్‌ ప్రభుత్వం తీసుకువచ్చిన తల్లికి వందనం పథకం విజయవంతంగా అమలవుతోంది. ఈ పథకం కింద విద్యార్థుల తల్లులకు రూ.13 వేలు బ్యాంకు ఖాతాల్లో ప్రభుత్వం జమ చేస్తున్న విషయం తెలిసిందే. అయితే ఈ పథకాన్ని ఆసరాగా చేసుకుని సైబర్‌ మోసగాళ్లు భారీ మోసానికి పాల్పడ్డారు. రూ.3 కోట్ల మేర దోపిడీ చేశారు. ఈ సంఘటన కర్నూలు జిల్లాలో చోటుచేసుకోగా.. మోసపోయిన బాధితులు లబోదిబోమంటున్నారు. దీనికి సంబంధించిన వివరాలు ఇలా ఉన్నాయి.

'తల్లికి వందనం' పథకం లబ్ధిదారులను లక్ష్యంగా చేసుకుని.. వర్చువల్ సిమ్‌ల ద్వారా భారీ సైబర్ మోసానికి పాల్పడ్డారని పథకం లబ్ధిదారులు వాపోయారు. సైబర్ నేరగాళ్లు లబ్ధిదారులకు ఫోన్ చేసి, వారి నుంచి ఓటీపీలను సేకరించి.. తద్వారా వారి బ్యాంకు ఖాతాల్లో జమ అయిన నిధులను కాజేసినట్లు పోలీసులు గుర్తించారు. కర్నూలు నగరానికి చెందిన పలువురు బాధితుల ఫిర్యాదుల మేరకు పోలీసులు దర్యాప్తు చేపట్టారు. వర్చువల్ సిమ్‌లను ఉపయోగించి మోసాలకు పాల్పడుతున్న ముఠాను గుర్తించారు.

తల్లికి వందనం పథకం సైబర్‌ మోసం కేసులో ప్రధాన నిందితుడిని కర్నూలు పోలీసులు అరెస్టు చేశారు. నిందితుడి వద్ద నుంచి 36 వర్చువల్ సిమ్‌లు, మొబైల్ ఫోన్లు, ఇతర కీలక ఆధారాలను స్వాధీనం చేసుకున్నారు. ఈ ముఠా ద్వారా కోట్ల రూపాయల విలువైన లావాదేవీలు జరిగినట్లు ప్రాథమిక విచారణలో తేలింది. పోలీసులు నిందితులను అదుపులోకి తీసుకుని వన్ టౌన్ పోలీస్ స్టేషన్‌కు తరలించారు. ఈ సందర్భంగా సీఐ  మాట్లాడుతూ తదుపరి దర్యాప్తు కోసం ఆధారాలు సేకరిస్తున్నామని, త్వరలోనే సమావేశం ఏర్పాటు చేసి పూర్తి వివరాలు వెల్లడిస్తామని తెలిపారు.

ఎంత అవగాహన కల్పిస్తున్నా సైబర్‌ మోసానికి గురవడంతో కర్నూలు పోలీసులు అప్రమత్తమయ్యారు. ఈ సందర్భంగా పోలీసులు ప్రజలకు కీలక సూచనలు జారీ చేశారు. ఎట్టి పరిస్థితుల్లోనూ తెలియని వ్యక్తులకు ఓటీపీలు, బ్యాంకు ఖాతా వివరాలు లేదా వ్యక్తిగత సమాచారాన్ని వెల్లడించవద్దని సూచించారు. అనుమానాస్పద ఫోన్ కాల్స్ లేదా సందేశాలు వచ్చిన వెంటనే సమీప పోలీస్ స్టేషన్‌ను లేదా సైబర్ క్రైమ్ విభాగాన్ని సంప్రదించాలని ప్రజలకు సూచనలు చేశారు. తల్లికి వందనం పథకం కింద ఇప్పటికే ఏపీ పోలీస్‌ యంత్రాంగం అవగాహన కల్పించినా ఈ స్థాయిలో పెద్ద ఎత్తున మహిళలు మోసపోవడం విస్మయానికి గురి చేసింది.

Yellampalli Project News: ఎగువ ప్రాంతాల్లో కురుస్తున్న భారీ వర్షాల ధాటికి ఉత్తర తెలంగాణలోని ప్రధాన జలాశయాలకు జలకళ సంతరించుకుంది. ఎగువన ఉన్న కడెం ప్రాజెక్టు భారీ వరద ప్రవాహం చేరుకోవడంతో అధికారులు గేట్లు ఎత్తి దిగువకు భారీగా నీటిని విడుదల చేశారు. దీంతో మంచిర్యాలతో పాటు పెద్దపల్లి జిల్లాల సరిహద్దుల్లోని ఎల్లంపల్లి ప్రాజెక్ట్‌కు వరద ప్రవాహం అత్యంత ఉధృతంగా పెరుగుతోంది. అయితే, భద్రతను దృష్టిలో ఉంచుకుని ఇరిగేషన్ శాఖ అధికారులు తక్షణమే అత్యవసర చర్యలు చేపట్టారు.

ఈ రోజు రాత్రి 7:30 గంటలకు ఎల్లంపల్లి ప్రాజెక్ట్ రేడియల్ క్రస్ట్ గేట్లను తెరిచి.. దిగువ గోదావరి నదిలోకి దాదాపు 1,00,000 క్యూసెక్కులకు పైగా నీటిని విడుదల చేయనున్నట్లు రామగుండం ఇరిగేషన్ విభాగం ఎగ్జిక్యూటివ్ ఇంజనీర్ (EE) అధికారికంగా ప్రకటించారు.

వరద నీరు ఒక్కసారిగా ఉప్పొంగే ప్రమాదం ఉన్నందున ప్రాజెక్ట్ దిగువన ఉన్న గోదావరి పరివాహక గ్రామాల ప్రజలను అధికారులు ప్రత్యేకమైన హెచ్చరికలు జారీ చేశారు. గోదావరి తీర ప్రాంతాల వైపు ఎవరూ వెళ్లకూడదని ఆంక్షలు విధించారు. ముఖ్యంగా ఈ ప్రాంతాలకు సంబంధించిన ప్రజలు అత్యంత అప్రమత్తంగా ఉండాలని సూచించారు.

అలాగే నదిలో ప్రవాహ వేగం ప్రమాదకర స్థాయిలో ఉన్నందున చేపల వేట కోసం నదిలోకి దిగడం కానీ.. పడవలు నడపడం మానుకోవాలని అధికారులు సూచిస్తున్నారు. పశువులను, గొర్రెలతో పాటు మేకల మందలను మేత కోసం నదీ తీరంలోకి కానీ.. ముంపు ప్రాంతాల్లోకి గానీ తీసుకెళ్లవద్దని కోరారు. దిగువ ముంపు ప్రాంతాల ప్రజలు నిరంతరం పరిస్థితిని గమనిస్తూ అప్రమత్తంగా ఉండాలని.. అవసరమైతే సురక్షిత ప్రాంతాలకు లేదా పునరావాస కేంద్రాలకు మారేందుకు సిద్ధంగా ఉండాలని ఆదేశించారు.

Man Lights Diya Inside Moving Train Video: భక్తితో ఉండడం తప్పు కాదు.. కానీ అది ఇతరుల ప్రాణాలకు లేదా ప్రజా ఆస్తులకు ముప్పుగా మారినప్పుడు తీవ్ర పరిణామాలకు దారితీస్తుంది. తాజాగా సోషల్ మీడియాలో వైరల్ అవుతున్న ఒక వీడియో నెటిజన్లను ఆశ్చర్యానికి గురి చేస్తోంది.. కదులుతున్న ఒక రైలులో ఒక వ్యక్తి చేసిన నిర్వాకం ఇప్పుడు ఇంటర్నెట్‌లో తీవ్ర దుమారాన్ని రేపుతోంది.. దీనికి సంబంధించిన వీడియో కూడా  ఇప్పుడు సోషల్ మీడియాల్లో సంచలనంగా మారింది. అయితే, దీనికి సంబంధించి పూర్తి వివరాలు ఇప్పుడు తెలుసుకుందాం.

కదులుతున్న రైలులో దీపారాధన..
సాధారణంగా రైలు ప్రయాణాల్లో అగ్గిపెట్టెలు, లైటర్లు లేదా మండే స్వభావం కలిగిన పదార్థాలను తీసుకెళ్లడం చట్టరీత్యా నేరం.. కానీ, ఓ వ్యక్తి వీటన్నింటినీ పక్కన పెట్టి.. భారీగా ప్రయాణికులు కలిగిన కదులుతున్న రైలు భోగిలోనే పూజలు చేయడం ప్రారంభించాడు.. అంతటితో ఆగకుండా ప్రమిదలో నూనె పోసి.. ఒత్తి వేసి నిప్పు వెలిగించాడు. రైలు వేగంగా వెళ్తుండగా దేవుడికి హారతి ఇస్తూ.. నమస్కారాలు చేయడం ఇప్పుడు వైరల్ అవుతున్న వీడియోలో మీరు క్లియర్‌గా చూడొచ్చు..

ప్రమాదం జరిగితే పరిస్థితి ఏంటి?
రైలు వేగంగా వెళ్తున్నప్పుడు గాలి దాటికి ఆ దీపం కిందపడినా.. లేదా పక్కనే ఉన్న ప్రయాణికుల దుస్తులకు, సీట్లకు మంటలు అంటుకున్నా తీవ్ర ప్రమాదం జరిగే అవకాశం ఉంది.. గతంలో రైళ్లలో సంభవించిన ప్రమాదాలను గుర్తుచేసుకుంటూ.. పలువురు ప్రయాణికులు భయాందోళన వ్యక్తం చేస్తున్నారు. ఒక చిన్న నిప్పు రవ్వ కూడా పెద్ద ఎంత ప్రమాదానికి దారితీస్తుందో తెలిసి కూడా ఇలాంటి బాధ్యతారాహిత్యమైన పనులు చేయడంపై ఆ వ్యక్తిపై విమర్శలు వ్యక్తమవుతున్నాయి.

Rat steals diamond jewellery worth rs 10 lakh in Karnataka: సాధారణంగా నగల షాపులోని యజమానులు చాలా జాగ్రత్తగా ఉంటారు. ముఖ్యంగా బంగారం, వెండి రెట్లు ధరలు భారీగా పెరిగిపోయిన తర్వాత చోరీలు మరీ ఎక్కువయ్యాయి. ఈక్రమంలో ఇప్పటికే చాలా మంది కస్టమర్ల రూపంలో వచ్చిన దొంగలు బంగారంను కొట్టేస్తు అడ్డంగా దొరికిపోయిన ఘటనలు కొకొల్లలు.  సీసీటీవీలో ఎప్పటికప్పుడు సిబ్బంది నిఘాలుపెడుతుంటారు.  ఒక కస్టమర్ షోరూంలో ఎంట్రీ అయినప్పటి నుంచి అతను తిరిగి వెళ్లిపోయే వరకు  ఒక కంట కనిపెడుతూనే ఉంటారు. ఏ మాత్రం అనుమానాస్పదంగా కన్పించిన వెంటనే అతడ్ని పట్టుకుని తనిఖీలు చేస్తారు.  ఈ క్రమంలో కర్ణాటకలోని తూమకూరులోని గోల్డ్ షాపులో వింత ఘటన చోటు చేసుకుంది. ఇది కాస్త ప్రస్తుతం నెట్టింట వైరల్ గా మారింది.

 Himalayan Diamond Flower Video: ప్రకృతి ఒడిలో ఎన్నో వింతలు, విశేషాలు దాగి ఉంటాయని మనందిరికీ తెలుసు.. ముఖ్యంగా మంచు కొండలతో కూడిన హిమాలయాల్లో లభించే వృక్ష సంపద, అరుదైన మొక్కలు నిత్యం శాస్త్రవేత్తలతో పాటు సామాన్యులను సైతం ఆశ్చర్యపరుస్తుంటాయి. తాజాగా అలాంటి ఒక అద్భుతమైన, అత్యంత అరుదైన పువ్వుకు సంబంధించిన వీడియో సోషల్ మీడియాలో నెటిజన్లను విశేషంగా ఆకట్టుకుంటూ వైరల్ అవుతోంది.

సముద్ర మట్టానికి దాదాపు 13,000 అడుగులకు పైగా ఎత్తైన ప్రతికూల వాతావరణంలో మాత్రమే పెరిగే ఈ పువ్వును  హిమాలయన్ డైమండ్ ఫ్లవర్ అని.. స్థానికంగా కేంజో (Kenjo) అని పిలుస్తారు. ఈ అరుదైన మొక్క అత్యంత అద్భుతమైన జీవిత చక్రాన్ని కలిగి ఉంటుంది. సాధారణ పూల మొక్కల్లాగా ఇవి ప్రతి ఏటా లేదా ప్రతి సీజన్‌లో పూయవు.. కేవలం 7 నుంచి 15 సంవత్సరాలకు ఒక్కసారి మాత్రమే ఈ మొక్క విరబూస్తూ ఉంటుందని సమాచారం. పైగా.. ఈ పూల ఆకారం మనిషి ఎత్తు కంటే ఎక్కువ పొడవు పెరగడం విశేషం.. దట్టమైన మంచు, హానికరమైన తీవ్ర గాలులు వీచే ఎత్తైన పర్వత ప్రాంతాల్లో ఇది అత్యంత దృఢంగా పెరుగుతుంది.

ఈ కేంజో మొక్క నిర్మాణం సైంటిఫిక్ పరంగా ఎంతో అద్భుతమైనదిగా భావించవచ్చు. పసుపు రంగులో ఉండే దీని ఆకులు ఒక గ్లాస్‌హౌస్ లాగా పనిచేస్తాయి. ఇవి లోపల ఉన్న సున్నితమైన పువ్వులను, విత్తనాలను హిమాలయాల అతినీలలోహిత (UV) కిరణాలు, చలిగాలుల నుంచి రక్షిస్తూ ఉంటాయని సమాచారం. లోపలి భాగాన్ని వెచ్చగా ఉంచడం వల్ల పునరుత్పత్తి ప్రక్రియకు ఇవి ఎంతగానో సహాయపడుతూ ఉంటాయి.

Sidiri Appalaraju Son Bike Accident Case: 'బైక్‌ ప్రమాదంలో 18 ఏళ్ల విద్యార్థి జీవితాన్ని నాశనం చేస్తున్న చంద్రబాబు గడ్డి తింటున్నారా..? మనిషా? రాక్షసుడా..?' అని మాజీ ముఖ్యమంత్రి వైఎస్‌ జగన్‌ తీవ్ర వ్యాఖ్యలు చేశారు. ఇదే టీడీపీ నాయకులు ఎవరైనా చేస్తే ఇలాగే శిక్షలు విధిస్తారా..? అని ప్రశ్నించారు. 'ఇదే శ్రీకాకుళం ఎమ్మెల్యే, పాతపట్నం ఎమ్మెల్యే ప్రమాదం చేస్తే ఈ కేసుల్లో ఎవరిని అరెస్టు చేశారు. ఒక్కొక్కరికి ఒక్కోలా చేస్తే వ్యవస్థ బతకదు. చంద్రబాబు విష విత్తనాలు నాటుతున్నారు. అదే వ్యవస్థను నాశనం చేస్తున్నారు' అని వైఎస్సార్‌సీపీ అధినేత వైఎస్‌ జగన్‌ తీవ్ర ఆగ్రహం వ్యక్తం చేశారు.

శ్రీకాకుళం జిల్లా రణస్థలం మండలం పైడిభీమవరానికి చేరుకుని మాజీ మంత్రి సీదిరి అప్పలరాజు కుటుంబాన్ని పరామర్శించారు. అప్పలరాజు జైలుకు వెళ్లడంతో తాము ఉంటామని.. వైఎస్సార్‌సీపీ అండగా ఉంటుందని ఆ కుటుంబానికి మాజీ సీఎం వైఎస్‌ జగన్ భరోసా ఇచ్చారు. అంతకుముందు విశాఖపట్నం నుంచి రోడ్డుమార్గంలో జగన్ శ్రీకాకుళం చేరుకున్నారు. దారిపొడవునా అభిమానులకు అభివాదం చేస్తూ ముందుకు సాగారు. ఆంక్షలు ఉన్నప్పటికీ పెద్దసంఖ్యలో అభిమానులు తరలివచ్చారు. చంద్రబాబు ప్రభుత్వంపై మాజీ ముఖ్యమంత్రి వైఎస్‌ జగన్‌ ధ్వజమెత్తారు. అక్రమ కేసులు పెట్టడమే చంద్రబాబు సర్కారు తెలిసిన పని.. కూటమి ప్రభుత్వం కక్ష సాధింపు చర్యలకు సీదిరి అప్పలరాజు అరెస్ట్‌ ఉదాహరణ అని వివరించారు.

Neeraj Chopra CWG Final: కామన్వెల్త్ గేమ్స్ (CWG) 2026 పురుషుల జావెలిన్ త్రో క్వాలిఫికేషన్ రౌండ్‌లో భారత స్టార్ అథ్లెట్ నీరజ్ చోప్రా అద్భుతమైన ప్రదర్శన చేశాడు. రెండుసార్లు ఒలింపిక్ పతక విజేతగా నిలిచిన నీరజ్ చోప్రా కామన్వెల్త్ గేమ్స్‌లో ఫైనల్‌ పోరుకు చేరాడు. ఫైనల్‌కు అర్హత సాధించే క్రమంలో తీవ్రమైన పోటీ నెలకొనగా..నీరజ్ చోప్రాతో పాటు మరో ఇద్దరు భారత ఆటగాళ్లు సత్తా చాటి ఫైనల్‌కు చేరారు.

క్వాలిఫికేషన్ హైలైట్స్
ఈ పోటీలో పాల్గొన్న ఏ అథ్లెట్ కూడా నిర్ణీత 84 మీటర్ల ఆటోమేటిక్ క్వాలిఫికేషన్ మార్కును అందుకోలేకపోయారు. ఆటోమేటిక్ మార్కు నమోదు కాకపోవడంతో, ఉత్తమ ప్రతిభ కనబరిచిన టాప్-12 మంది అథ్లెట్లను ఫైనల్ రౌండ్‌కు ఎంపిక చేశారు. 2018 కామన్వెల్త్ గేమ్స్ ఛాంపియన్ అయిన నీరజ్ చోప్రా 79.61 మీటర్ల ఉత్తమ త్రోతో క్వాలిఫికేషన్ స్టాండింగ్స్‌లో ఐదవ స్థానంలో నిలిచి ఫైనల్‌ బెర్త్ ఖరారు చేసుకున్నారు.

భారత్ నుండి ముగ్గురు ఫైనల్‌కు
నీరజ్ చోత్రాతో పాటు ఇతర భారతీయ జావెలిన్ త్రో అథ్లెట్లు కూడా అంచనాలను అందుకుంటూ ఫైనల్‌లోకి ప్రవేశించారు. రోహిత్ యాదవ్ 78.37 మీటర్ల త్రోతో తొమ్మిదవ స్థానంలో ఉండగా.. యశ్ వీర్ సింగ్ 78.36 మీటర్ల త్రోతో పదవ స్థానంలో నిలిచాడు.

ఫైనల్ చేరిన ఆటగాళ్ల వివరాలు..
1) రుమేష్ పతిరాగే (శ్రీలంక) - 82.84 మీటర్లు

2) ఆండర్సన్ పీటర్స్ (గ్రేనాడా) - 81.29 మీటర్లు

3) డౌ స్మిత్ (దక్షిణాఫ్రికా) - 80.64 మీటర్లు

4) బెన్ ఈస్ట్ (ఇంగ్లాండ్) - 80.38 మీటర్లు

5) నీరజ్ చోప్రా (భారత్) - 79.61 మీటర్లు

6) కామెరాన్ మెక్‌ఎంటైర్ (ఆస్ట్రేలియా) - 78.91 మీటర్లు

7) అర్షద్ నదీమ్ (పాకిస్థాన్) - 78.63 మీటర్లు

8) కీషాన్ స్ట్రాచన్ (బహ్‌మాస్) - 78.60 మీటర్లు

9) రోహిత్ యాదవ్ (భారత్) - 78.37 మీటర్లు

10) యశ్ వీర్ సింగ్ (భారత్) - 78.36 మీటర్లు

11) కేశోర్న్ వాల్‌కాట్ (ట్రినిడాడ్ & టొబాగో) - 78.26 మీటర్లు

12) చినెచెరెమ్ నమ్ది (నైజీరియా) - 75.27 మీటర్లు.

ఫైనల్ మ్యాచ్ వివరాలు
జావెలిన్ త్రో ఫైనల్ పోరు భారత కాలమానం ప్రకారం శనివారం (ఆగస్టు 1) అర్ధరాత్రి 12:45 గంటలకు (IST) ప్రారంభం కానుంది. పతకం కోసం జరిగే ఈ తుది పోరులో భారత్ నుండి ముగ్గురు అథ్లెట్లు బరిలోకి దిగుతున్నారు.

Gouravelli Reservoir: సిద్దిపేట జిల్లా హుస్నాబాద్ నియోజకవర్గ ప్రజల దశాబ్దాల కలను సాకారం చేస్తూ.. గౌరవెల్లి రిజర్వాయర్ పర్యావరణ అనుమతులపై సుప్రీంకోర్టు చారిత్రాత్మక తీర్పునిచ్చింది. ప్రాజెక్టుకు సంబంధించిన ఎన్విరాన్‌మెంట్ క్లియరెన్స్‌కు అత్యున్నత న్యాయస్థానం గ్రీన్ సిగ్నల్ ఇవ్వడంతో ఎన్నో ఏళ్లుగా న్యాయపరమైన చిక్కుల్లో నలిగిపోయిన గౌరవెల్లి నిర్మాణానికి ఎట్టకేలకు మోక్షం లభించింది.

తుది దశకు ప్రాజెక్ట్..
గతంలో BRS ప్రభుత్వ హయాంలో పర్యావరణ అనుమతులు లేకుండానే.. గౌరవెల్లి ప్రాజెక్టును నిర్మిస్తున్నారని ఆరోపిస్తూ.. కొందరు భూ నిర్వాసితులు నేషనల్ గ్రీన్ ట్రిబ్యునల్ (NGT), సుప్రీంకోర్టు వనశక్తి సంస్థల ద్వారా కేసు దాఖలు చేశారు. దీంతో పనులు నిలిచిపోయాయి. అయితే, తాజాగా ఈ కేసులపై విచారణ జరిపిన సుప్రీంకోర్టు.. రాష్ట్రంలో ఇప్పటికే మంజూరైన కీలక సాగునీటి ప్రాజెక్టుల పర్యావరణ అనుమతులు పూర్తిగా చెల్లుబాటులో ఉంటాయని స్పష్టం చేసింది.. ప్రస్తుతం 95 శాతం పనులు పూర్తయిన ఈ ప్రాజెక్టు.. మిగిలిన 5 శాతం పనులను కూడా త్వరితగతిన పూర్తి చేసి వినియోగంలోకి తీసుకురావడానికి మార్గం సుగమమైంది.

1.20 లక్షల ఎకరాలకు సాగునీరు.. 
మొత్తం 8.23 TMCల నీటి నిల్వ సామర్థ్యంతో నిర్మిస్తున్న గౌరవెల్లి రిజర్వాయర్ పూర్తయితే.. హుస్నాబాద్ పరిసర ప్రాంతాల్లోని 1,20,000 ఎకరాలకు పైగా ఆయకట్టుకు పుష్కలంగా సాగునీరు అందుతుంది. వర్షాభావ పరిస్థితులతో నిత్యం కరువు భయంతో అల్లాడే ఈ ప్రాంతం.. గౌరవెల్లి జలాలతో సస్యశ్యామలం కాబోతోంది. వ్యవసాయ రంగం పండుగలా మారి.. స్థానిక రైతాంగ ఆర్థిక పరిస్థితి రూపురేఖలు మారనున్నాయి.

సుప్రీంకోర్టు అనుకూల తీర్పునివ్వడంతో హుస్నాబాద్ నియోజకవర్గ వ్యాప్తంగా పండగ వాతావరణం నెలకొంది. పట్టణంలోని అంబేద్కర్ చౌరస్తా వద్ద కాంగ్రెస్ నాయకులు, రైతులు భారీ ఎత్తున టపాసులు కాల్చి సంబరాలు జరుపుకున్నారు. రాజ్యాంగ నిర్మాత డాక్టర్ బి.ఆర్. అంబేద్కర్ విగ్రహానికి పూలమాలలు వేసి.. ఒకరికొకరు మిఠాయిలు తినిపించుకున్నారు.

ఈ సందర్భంగా నాయకులు మాట్లాడుతూ.. రాష్ట్రంలో ప్రజా ప్రభుత్వం అధికారంలోకి వచ్చిన తర్వాత.. రవాణా, బీసీ సంక్షేమ శాఖ మంత్రి పొన్నం ప్రభాకర్ ప్రత్యేక శ్రద్ధ తీసుకుని సుప్రీంకోర్టులో బలమైన వాదనలు వినిపించడం వల్లే ఈ విజయం సాధ్యమైందని కొనియాడారు.. ఎంతటి క్లిష్ట పరిస్థితుల్లోనైనా రైతు ప్రయోజనాలే ధ్యేయంగా పనిచేస్తున్న ప్రస్తుత ప్రజా పాలన ప్రభుత్వం నిజమైన రైతు సంక్షేమ ప్రభుత్వం అని నిరూపించుకుందని హర్షం వ్యక్తం చేశారు.