Ajit Pawar के निधन पर महाराष्ट्र शोक, Amol Mitkari ने लिखा भावुक पत्र

व्हॅलेंटाइन डे.. प्रेम व्यक्त करण्याचा दिवस. पाश्चात्य देशातून आलेला हा दिवस आज भारतातही मोठ्या प्रमाणावर साजरा होताना दिसतो.पण यावर्षी हा दिवस काहींसाठी फक्त प्रेमाचा नाही, तर विरहाच्या वेदनेचाही ठरला आहे.राज्याचे उपमुख्यमंत्री अजित पवार यांच्या विमान अपघातातील दुर्दैवी निधनानंतर संपूर्ण राज्य शोकसागरात बुडाले आहे. त्यांच्या जाण्याने निर्माण झालेली पोकळी अजूनही भरून निघालेली नाही. प्रेम, आपुलकी आणि आधार देणारा नेता हरपल्याची भावना प्रत्येकाच्या मनात आहे.याच भावनिक पार्श्वभूमीवर राष्ट्रवादी काँग्रेसचे आमदार अमोल मिटकरी यांनी व्हॅलेंटाइन डेच्या निमित्ताने दादांना उद्देशून एक हृदयस्पर्शी पत्र लिहिले आहे. “दादा… आय लव्ह यू!” “आदरणीय दादा, आज व्हॅलेंटाइन डे! आपल्या प्रिय व्यक्तीप्रती भावना व्यक्त करण्याचा दिवस. तुम्ही असताना प्रेम व्यक्त करण्याची हिंमत झाली नाही, पण तुम्ही नसताना हे शब्द मनातून ओघळत आहेत…” मिटकरी आपल्या पत्रात लिहितात की, दादांच्या निधनावर त्यांचा अजूनही विश्वास बसत नाही. २०१९ मध्ये पक्षात घेतले, जबाबदारी दिली, आमदार केले, राजकीय प्रतिष्ठा दिली – हे सर्व आयुष्यभराचं ऋण असल्याची भावना त्यांनी व्यक्त केली आहे. “मी अनेकांना अप्रिय होतो, पण तुम्हाला प्रिय होतो. चुका केल्या, पण तुम्ही दुरुस्त केल्या. वाढदिवसाला पहिला फोन तुमचा,सुखदुःखात खंबीरपणे पाठीशी उभे राहणारे फक्त तुम्हीच!” मिटकरींच्या शब्दांत दादांबद्दलची कृतज्ञता आणि प्रेम स्पष्ट जाणवतं. “तुमच्या नावावर माझी दादागिरी चालायची,” असं सांगताना ते भावूक होतात. गाव, परिवार, समाज यांच्यावर प्रेम करायला शिकलो ते तुमच्यामुळेच,असंही ते नमूद करतात. भीमाकोरेगावला जाऊन अभिवादन करणारा तो करारी ‘जयभीम’चा आवाज आता ऐकू येणार नाही, याची सल त्यांच्या शब्दांत उमटते. शिवशाहू-फुले-आंबेडकर विचारांवरील श्रद्धा, सर्वधर्मीयांबद्दलचा जिव्हाळा – हे दादांचं वेगळेपण त्यांनी अधोरेखित केलं आहे. “आज एकादशी आहे, तुमच्यामुळे विठ्ठलाच्या अधिक प्रेमात पडलो. पण त्यानेच तुम्हाला हिरावून घेतलं. त्या विठ्ठलाशी आयुष्यभर भांडण राहील,” अशी अंतर्मुख वेदना त्यांनी व्यक्त केली आहे. पत्राच्या शेवटी एकच आर्त हाक – “लव्ह यू दादा… दादा आय लव्ह यू… आज खूप मिस करतोय दादा…” जय शिवराय… जयभीम… जय महाराष्ट्र… व्हॅलेंटाइन डेच्या दिवशी व्यक्त झालेलं हे प्रेम केवळ एका नेत्यासाठी नाही, तर एका मार्गदर्शक, आधारवड आणि आपुलकीच्या व्यक्तीसाठी आहे. राजकारणाच्या पलीकडे जाऊन नात्यांची जपणूक करणाऱ्या दादांप्रती व्यक्त झालेली ही भावना अनेकांच्या डोळ्यांत पाणी आणणारी ठरते आहे.