विवाहाचे स्वप्न दाखवून शेतकरी तरुणाची आर्थिक लूट करणाऱ्या टोळीचा यवतमाळच्या घाटंजी पोलिसांनी पर्दाफाश केला आहे. याप्रकरणी मुख्य आरोपी सिमरन पाटीलसह तिची आई, भाऊ व अन्य दोन सहकाऱ्यांना अटक करण्यात आली आहे. नाशिक च्या बानगाव येथील शेतकरी युवकाचे लग्न जुळवण्यासाठी घाटंजी तालुक्यातील चोरंबा येथील सिमरन पाटील हिचा प्रस्ताव पुढे आला. घरची परिस्थिती हलाखीची असल्याचे सांगत विवाहाचा खर्च मुलाकडच्यांनी उचलावा, अशी अट घालून मुलाकडून दोन लाख ५० हजार रुपये उकळण्यात आले. पैसे मिळताच सिमरन, तिची आई, भाऊ व इतर दोघे साथीदारही वेळ साधून तेथून निसटले. यानंतर घाटंजी पोलीस ठाण्यात तक्रार दाखल झाल्यानंतर पोलिसांनी तपासाची चक्रे फिरवत गुन्हा दाखल करून आरोपींना अटक केली. काही महिन्यांपूर्वी एका शेतकऱ्याला सार्वजनिक ठिकाणी मारहाण करून दुचाकी हिसकावून नेल्याच्या घटनेत ती व तिचा भाऊ आरोपी होते. या अपमानानंतर संबंधित शेतकऱ्याने विष प्राशन करून आत्महत्या केली होती. त्या आत्महत्या prकरणातही घाटंजी पोलीस ठाण्यात गुन्हा दाखल असून सिमरन नुकतीच कारागृहातून बाहेर आली होती. या टोळीने महाराष्ट्रासह इतरही राज्यात कोणाची फसवणूक केली आहे का याचा पोलीस तपास करत आहेत.