ठाण्यातील विकासकामांच्या निधीवर प्रश्नचिन्ह? भाजप नगरसेवक नारायण पवार यांची फडणवीस यांना चौकशीची मागणी ठाणे महानगरपालिकेतील विकासकामांकरिता 2022 नंतर तब्बल 3900 कोटी रुपयांचा निधी देण्यात आला असूनही नागरिकांना मूलभूत सुविधा न मिळाल्याने ठाण्यातील भाजप नगरसेवक नारायण शंकर पवार यांनी मुख्यमंत्री देवेंद्र फडणवीस यांना चौकशी करण्याची मागणी पत्राद्वारे केली आहे. पवार यांनी आपल्या पत्रात नमूद केले आहे की, केंद्र व राज्य सरकारकडून ठाणे महानगरपालिकेला मिळालेल्या निधीतून रस्ते, गटारे, पाणीपुरवठा, प्रकाशयोजना, सांडपाणी व्यवस्थापन यांसारख्या मूलभूत सेवांचा दर्जा अजूनही समाधानकारक नाही. नागरिकांना अनेक ठिकाणी अडचणींना सामोरे जावे लागत असून, मोठा निधी खर्च झाल्याचे सांगितले जात असले तरी त्याचा प्रत्यक्ष लाभ नागरिकांना मिळत नाही, असे त्यांनी नमूद केले आहे. नगरसेवक पवार यांनी पुढे स्पष्ट केले आहे की, केंद्र आणि राज्य सरकारच्या विविध योजनांतर्गत 2022 पासून ठाणे महानगरपालिकेला एकूण 3900 कोटी रुपयांचा निधी प्राप्त झाला आहे. मात्र, या निधीचा वापर पारदर्शकतेने झाला आहे काय, याबाबत शंका निर्माण झाली असून, त्यावर सखोल चौकशी करण्याची मागणी त्यांनी केली आहे. दरम्यान, सत्तेत जरी महायुती असली तरी ठाणे महानगरपालिकेत मात्र फक्त शिवसेनेच्या नगरसेवकांनाच निधी दिला जातो, तर भाजपच्या नगरसेवकांना निधी मिळत नाही, अशी चर्चा ठाण्यातील राजकीय वर्तुळात सुरू आहे. या पार्श्वभूमीवर पवार यांनी कंटाळूनच हे पत्र लिहिलं की काय, असा सवालही स्थानिक पातळीवर उपस्थित केला जात आहे. भाजपच्या नगरसेवकाकडून आलेल्या या पत्रामुळे ठाणे महापालिकेतील निधीवाटप आणि विकासकामांच्या पारदर्शकतेबाबत नव्याने चर्चेला उधाण आले आहे..