कोल्हापुरात शिंदे शिवसेना आणि काँग्रेस यांच्यात कोणत्याही परिस्थितीत युती होणार नसल्याचं स्पष्ट करण्यात आलं आहे. शिवसेना आमदार राजेश क्षीरसागर यांनी याबाबत ठाम भूमिका मांडत “कोल्हापुरात काँग्रेससोबत युती करण्याचा प्रश्नच उद्भवत नाही,” असं स्पष्ट शब्दांत सांगितलं. कोल्हापूर महानगरपालिकेवर महायुतीचाच झेंडा फडकला असून महायुतीचाच महापौर महापालिकेत असेल असा विश्वास त्यांनी कोल्हापुरात घेतलेल्या पत्रकार परिषदेत व्यक्त केला आहे. महानगरपालिकेत भाजपा, शिवसेना आणि राष्ट्रवादी काँग्रेस या तिन्ही पक्षांना समान न्याय दिला जाईल, असं सांगत, कोणत्याही पक्षावर अन्याय होणार नाही, अशी ग्वाही त्यांनी दिली. महायुतीच्या यशामागे तिन्ही पक्षांच्या नेत्यांची एकजूट, संघटनात्मक ताकद आणि कार्यकर्त्यांचे परिश्रम कारणीभूत ठरणार असल्याचंही क्षीरसागर यांनी नमूद केलं.