कातकरींच्या अस्तित्वासाठी श्रमजीवी संघटना करणार आत्मक्लेशातून आत्मनिर्धार.. ५ नोव्हेंबर पासून ठाणे जिल्हाधिकारी कार्यालयासमोर देणार आत्मक्लेशातून आत्मनिर्धाराकडे लढा... ठाण्यात आत्मनिर्धार सुरु असताना श्रमजीवीच्या प्रत्येक गावा, पाड्यात उपवास करून सायंकाळी दारात लागणार आत्मक्लेशातून निर्धाराचा दिवा.... देश स्वातंत्र्याच्या शताब्दीच्या उंबरठ्यावर आहे. तर देशाची आर्थिक राजधानी असलेल्या मुंबईपासून केवळ काही किलोमीटर अंतरावर राहणाऱ्या आदिम कातकऱ्यांच्या श्रमाचा अमानुष बाजार आहे. लहान मुलांचं बालपण खुडून नेलं जातंय तर त्यांच्या माणूस म्हणून जगणच नाकारलं जातंय. दारिद्र्य, अन्याय आणि प्रशासनाच्या दीर्घकालीन अंमलबजावणीतील दिरंगाईमुळे हा आदिम समाज खुले आम उध्वस्ततेच्या मार्गावर उभा आहे. श्रमजीवी संघटनेने या आदिवासी जमातीसाठी आत्मक्लेशातून आत्मनिर्धाराचे निर्णायक पाऊल उचले आहे. येत्या ५ ते ६ नोव्हेंबर दरम्यान ठाणे जिल्हाधिकारी कार्यालयासमोर या विदारक परिस्थितीच्या पार्श्वभूमीवर उत्तरदायित्वाची भावना म्हणून श्रमजीवी संघटनेचे अध्यक्ष रामभाऊ वारणा आणि संस्थापक विवेक पंडित तसेच संघटनेचे ज्येष्ठ पदाधिकारी आत्मक्लेशातून आत्मनिर्धार’ मौन पाळून साधणार आहेत.\nया अन्यायकारक आणि मानवी संवेदनांना चिरडून टाकणाऱ्या आजच्या विदारक परिस्थितीकडे शासन आणि समाजाचे लक्ष वेधण्यासाठी श्रमजीवी संघटनेचा ठाणे जिल्हाधिकारी कार्यालयासमोर 5 नोव्हेंबरला ‘आत्मक्लेशातून आत्मनिर्धार सुरु असताना संघटनेच्या प्रत्येक गावा पाड्यात प्रौढ सभासद दिवसभर उपाशी राहून आत्मक्लेश करुन सायंकाळी प्रत्येक गावा गावात, पाड्या - पाड्यात आपल्या घरा - दारात नव्या आत्मनिर्धाराचा प्रतिकात्मक दिवा लावला जाणार आहे.\nया ५-६ नोव्हेंबर २०२५ रोजी ठाणे जिल्हाधिकारी कार्यालयासमोर होणार आहे. शासनाने तात्काळ ठोस आणि परिणामकारक पावले उचलून कातकरी समाजाला माणूस म्हणून जगण्याचा आणि सन्मानाने उभं राहण्यासाठी अधिकारांची अंमलबजावणी करावी, अशी मागणी या लढ्यातून केली जाणार असल्याची माहिती श्रमजीवी संघटनेचे अध्यक्ष रामभाऊ वारणा यांनी दिलेली आहे. आत्मक्लेशातून आत्मनिर्धार केवळ संघर्ष नसून परागंदा होत असलेल्या समाजाच्या अस्तित्वासाठीचा ‘निर्धार’ आहे, अशी माहिती श्रमजीवी संघटनेने प्रसिद्धीपत्रकाद्वारे दिलेली आहे.