भिवंडी-निजामपूर शहर महानगरपालिकेच्या कोंबडपाडा येथील भांडार गृह विभागात खरेदी केलेली महागडी उपकरणे व वाहने वापराविना धुळखात पडल्याने सार्वजनिक निधीचा अपव्यय होत असल्याचा आरोप महाराष्ट्र नवनिर्माण सेनेने केला आहे. या संदर्भात लेखी तक्रार देखील करण्यात आली आहे. भिवंडी महापालिकेच्या घनकचरा प्रकल्पासाठी सुमारे 50 ते 60 लाख रुपये खर्च करून तीन वर्षांपूर्वी खरेदी केलेली बेलिंग मशीन एकदाही वापरली नसल्याचा परिणाम समोर आला आहे. तसेच कचर्‍यासाठीच्या शेकडो हातगाड्या धुळखात पडल्या आहेत. सन 25 ऑक्टोबर 2021 रोजी खरेदी केलेले अग्निशमन दलाचे वाहन MH-04 KU-2459 तसेच आणखी एक वाहन किरकोळ तांत्रिक कारणांमुळे अनेक महिन्यांपासून भांडार विभागात पडून असल्याचे तक्रारीत नमूद झाले आहे. भिवंडीसारख्या दाट लोकवस्तीच्या शहरात आगीच्या घटना वारंवार घडत असतानाही उपलब्ध साधनसामग्री वापराविना ठेवणे हा गंभीर निष्काळजीपणा असल्याचा आरोप मनसेकडून करण्यात आला आहे. या संपूर्ण प्रकरणात प्रशासकीय अधिकारी व ठेकेदार यांच्यात साटेलोटे असल्याचा आरोप करत उच्चस्तरीय चौकशीची मागणी केली आहे.