بھیونڈی میں امامِ مسجد کا جرأت مندانہ اقدام، غیر شرعی رسومات پر نکاح پڑھانے سے انکار — معافی اور توبہ کے بعد نکاح ادا مہاراشٹر کے شہر بھیونڈی کے علاقے اجمیر نگر میں واقع عطاء رسول مسجد کے امام، مولانا رفیق عالم نے ایک شادی کی تقریب میں غیر شرعی رسومات کے باعث نکاح پڑھانے سے انکار کر دیا۔ یہ واقعہ 8 فروری کو پیش آیا، جب شادی کی تقریب میں موسیقی، ناچ گانے اور دیگر غیر مناسب سرگرمیوں کا اہتمام کیا گیا تھا。 ذرائع کے مطابق، مولانا رفیق عالم نے ان امور پر سخت ناپسندیدگی کا اظہار کرتے ہوئے واضح کیا کہ نکاح ایک مقدس عبادت ہے اور اسے غیر شرعی رسومات کے ساتھ ادا نہیں کیا جا سکتا۔ انہوں نے نہ صرف خود نکاح پڑھانے سے انکار کیا بلکہ بھیونڈی میں تنظیم علمائے اہلسنت کے دیگر علمائے کرام سے بھی اپیل کی کہ وہ ایسی تقریبات میں شرکت سے گریز کریں جہاں خلافِ شرع سرگرمیاں انجام دی جا رہی ہوں。 اس فیصلے کے بعد شادی والے خاندان نے امام صاحب سے رابطہ کیا، اپنی کوتاہی کا اعتراف کرتے ہوئے اعلانیہ توبہ کی اور آئندہ ایسی رسومات سے اجتناب کا یقین دلایا۔ معافی طلب کرنے کے بعد مولانا رفیق عالم نے نکاح کی رسم ادا کرائی。 اس اقدام پر سماجی و دینی حلقوں میں مختلف آرا سامنے آ رہی ہیں۔ کلیان کے معروف سماجی شخصیت اور سابق پرنسپل اینگلو اردو ہائی اسکول نیرل، سید عارف علی رضوی نے اس موقع پر اپنے تاثرات میں کہا کہ معاشرے کی اصلاح اور دینی اقدار کے تحفظ میں علمائے کرام کا کردار ہمیشہ اہم رہا ہے۔ ان کے مطابق شادی بیاہ جیسی بابرکت تقریبات میں غیر شرعی امور کا فروغ اسلامی تہذیب اور روحانی اقدار کے لیے نقصان دہ ثابت ہو سکتا ہے، اور ایسے مواقع پر علما کا اصلاحی اقدام معاشرتی بیداری کا سبب بنتا ہے。 انہوں نے مزید کہا کہ مولانا رفیق عالم کا حالیہ اقدام دینی غیرت اور شرعی بصیرت کی روشن مثال ہے، جو اس امر کی یاد دہانی کراتا ہے کہ نکاح محض ایک سماجی رسم نہیں بلکہ ایک مقدس فریضہ ہے، جس کے تقاضے بھی پاکیزہ ہونے چاہئیں。 مقامی سطح پر اس واقعے کو ایک اہم اصلاحی قدم کے طور پر دیکھا جا رہا ہے، جب کہ بعض حلقے اسے معاشرتی رویّوں میں مثبت تبدیلی کی جانب اشارہ قرار دے رہے ہیں۔