जळगाव, धरणगावा वारंवार उद्भवणाऱ्या दुष्काळ व पुराच्या दुश्चक्रावर कायमस्वरूपी उपाय म्हणून ‘जलसंकल्प धरणगावचा’ हा महत्त्वाकांक्षी उपक्रम सुरू करण्यात आला आहे. या उपक्रमांतर्गत सुमारे २१० किलोमीटर लांबीच्या नाले व नदीपात्रांचे खोलीकरण आणि रुंदीकरण करण्यात येणार असून पाणी साठवण क्षमता वाढवून भूजल पातळी सुधारण्याचा उद्देश आहे. सीएसआर निधीच्या माध्यमातून पाळधी–चांदसर जि.प. गट (टप्पा क्र. १) अंतर्गत या प्रकल्पाची अंमलबजावणी सुरू झाली आहे. लाडली येथील फार्म हाऊस परिसरात आयोजित शेतकरी संवाद मेळाव्यात बोलताना पालकमंत्री गुलाबराव पाटील यांनी भविष्यातील जलसंकट टाळण्यासाठी सर्वांनी एकत्र येण्याचे आवाहन केले. नाला खोलीकरण म्हणजे शेतीच्या भविष्यासाठीचा विमा असून यामुळे विहिरी व बोअरवेल जिवंत राहण्यास मदत होईल, असे त्यांनी सांगितले. तसेच नाल्यातील गाळ शेतकऱ्यांना विनामूल्य देण्यात येणार असून त्यामुळे जमिनीची सुपीकता वाढणार आहे. तसेच विद्यमान बंधारे व के.टी. वेअरची दुरुस्ती करून आवश्यकतेनुसार नवीन बंधाऱ्यांची उभारणी केली जाणार असल्याचेही पालकमंत्री गुलाबराव पाटील यांनी प्रसंगी बोलत होते. या कार्यक्रमासाठी पालक मंत्र सह ,जिल्हा परिषदच्या मुख्याधिकारी मीनल करणवाल, कृषी अधिकारी वन विभागाचे अधिकारी उपस्थित होते..