धुळे जिल्ह्यातील साक्री तालुक्यातील महिर गावातल्या एक 14 वर्षीय अल्पवयीन मुलीचा मृत्यू झाला आहे. दरम्यान अज्ञात लोकांनी अल्पवयीन मुलीवर शारीरिक अत्याचार करून तिची हत्या केला असल्याचा आरोप मयत मुलीच्या कुटुंबीयांसह गावकऱ्यांनी केला आहे. मयत मुलीवर धुळ्यातील भाऊसाहेब हिरे शासकीय रुग्णालयात शवविच्छेदन करण्यात येत आहे. साक्री तालुक्यातील नागपूर सुरत राष्ट्रीय महामार्गावरील इच्छापुर गावाजवळ एक चौदा वर्षे अल्पवयीन मुलगी अत्यावस्थ अवस्थेत आढळून आली होती. तिला लागलीच रुग्णवाहिकेतून धुळ्यातील भाऊसाहेब हिरे शासकीय वैद्यकीय महाविद्यालयात उपचारासाठी दाखल करण्यात आलं. मात्र यावेळी डॉक्टरांनी तिला मृत घोषित केले. मयत मुलगी ही महीर गावाची राहिवासी असून ती इच्छापुर येथे आपल्या बहिणीकडे यात्रेनिमित्त गेली होती. दरम्यान यात्रेत फिरताना अचानक ती गायब झाली. दोन तासांनी संबंधित अल्पवयीन मुलगी जखमी अवस्थेत महामार्गावरील एक हॉटेल जवळ आढळून आली. अज्ञात लोकांनी तिच्यावर अत्याचार करून तिला महामार्गावर फेकून दिला असल्याचा आरोप महिर गावाचे सरपंच रमेश सरग यांनी केला आहे. दरम्यान शव विच्छेदन अहवाला नंतर आरोपींना अटक होईपर्यंत मृतदेह ताब्यात घेणार नसल्याचा इशारा गावकऱ्यांनी दिला आहे. तर या प्रकरणी पोलिसांनी प्रथमता आकस्मात मृत्यू दाखल केली असून पोलीस या प्रकरणाचा अधिक तपास करत आहेत.