कार्तिक एकादशीच्या दुसऱ्या दिवशी अकोल्यातील आराध्य दैवत श्री राज राजेश्वर मंदिरात पारंपरिक हरिहर-मिलन सोहळा मोठ्या उत्साहात साजरा करण्यात आला. भगवान विष्णू आणि भगवान महादेव यांच्या ऐक्याचे प्रतीक मानल्या जाणाऱ्या या सोहळ्याला भाविकांची मोठी गर्दी उसळली होती. मंदिर परिसर विद्युत रोषणाईने उजळून निघाला होता. रंगीत दिवे, फुलांची आकर्षक सजावट आणि भगवान शंकराच्या पिंडीवर हरिहरेश्वराच्या स्वरूपातील साज चढवण्यात आला. पिंडीवर हरिहर रूपातील सुंदर अलंकार व सजावट पाहण्यासाठी भाविकांनी रांगा लावल्या. दरवर्षी कार्तिक एकादशीनंतर साजरा होणारा हा पारंपरिक सोहळा अकोल्यातील धार्मिक संस्कृतीचा अविभाज्य भाग मानला जातो. या निमित्ताने दिवसभर विविध धार्मिक कार्यक्रमांचे आयोजन करण्यात आले. भजन-कीर्तन, हरिनाम संकीर्तन, पूजा-अर्चा तसेच प्रसाद वाटप यांचे आयोजन भाविकांच्या सहकार्याने पार पडले. या पवित्र सोहळ्याचा आनंद घेण्यासाठी अकोल्यासह परिसरातील नागरिकांनी मोठ्या संख्येने मंदिरात हजेरी लावली. भक्तिरसात न्हाऊन निघालेल्या वातावरणात “हर हर महादेव” आणि “श्रीहरी”च्या जयघोषाने संपूर्ण परिसर दुमदुमून गेला.