धाराशिव तुळजापूर ड्रग्ज प्रकरणावरून विधिमंडळात रणसंग्राम, उबाठा आमदार कैलास घाडगे पाटील विरुद्ध भाजप आमदार राणा जगजीत सिंह पाटील यांच्यात जुंपली धाराशिव जिल्ह्यातील तुळजापूर ड्रग्ज प्रकरणाचे पडसाद आज थेट विधिमंडळात उमटले. तुळजापूरमध्ये ड्रग्ज माफिया मोकाट असल्याचा गंभीर आरोप करत ठाकरे शिवसेनेचे आमदार कैलास घाडडे पाटील यांनी विधानसभा सभागृहात सरकारला थेट सवाल केला. तर दुसरीकडे भाजप आमदार राणा जगजीत सिंह पाटील यांनी विरोधक तुळजापूरची नाहक बदनामी करत असल्याचा आरोप करत, या संपूर्ण प्रकरणाची उच्चस्तरीय चौकशी करण्याची मागणी केली आहे. आमदार कैलास पाटील यांनी, “तुळजापूरमध्ये ड्रग्ज प्रकरण इतकं गंभीर असताना मुख्यमंत्री हे प्रकरण हलक्यात का घेत आहेत?” असा थेट सवाल उपस्थित केला. तसंच, “ड्रग्ज प्रकरणातील ‘अग्रवाल’ नावाचा मुख्य आरोपी अद्याप अटक का नाही?” असा सवाल करत पोलिसांच्या भूमिकेवरही त्यांनी गंभीर प्रश्नचिन्ह उपस्थित केलं. तर भाजप आमदार राणा जगजीत सिंह पाटील यांनी सभागृहात प्रत्युत्तर देताना सांगितलं की, तुळजापूर ड्रग्ज प्रकरणाबाबत मिळालेली माहिती आपण तात्काळ पोलिसांच्या कानावर घातली होती आणि त्यानंतर मोठी कारवाई झाली. मात्र या प्रकरणाचा आधार घेत काही विरोधक एकत्र येऊन षडयंत्र रचत तुळजापूरची बदनामी करत आहेत, असा आरोप त्यांनी केला. तुळजापूरची नाहक बदनामी कोण करतंय, याची चौकशी करण्यासाठी उच्चस्तरीय समिती गठीत करावी, अशी मागणीही आमदार राणा जगजीत सिंह पाटील यांनी विधिमंडळात केली.