छत्रपती संभाजीनगर जिल्ह्यातील मांडकी गावातून एक धक्कादायक प्रकार समोर आला आहे. मतिमंद विद्यार्थ्यांच्या निवासी विद्यालयात लहान मुलांना बेदम मारहाणीचा प्रकार उघडकीस आला आहे. या घटनेचा व्हिडिओ आता समोर आला असून, या अमानवी कृत्यामुळे संताप व्यक्त केला जात आहे. मांडकी गावातील चैतन्य कानिफनाथ निवासी मतिमंद विद्यालयात हा प्रकार घडला आहे. या विद्यालयातील एका लहान मुलाला शिपाई दीपक इंगळे याने बेदम मारहाण केल्याचा व्हिडिओ समोर आला आहे. व्हिडिओमध्ये स्पष्ट दिसतंय की, मुलाचे हात बांधून त्याला कुकरच्या झाकणाने मारहाण केली जात आहे. फक्त इतकंच नाही, तर या विद्यालयात इतर विद्यार्थ्यांनाही अत्याचाराला सामोरं जावं लागत असल्याचं तक्रारी आहे. विद्यालयातील केअरटेकरने देखील विद्यार्थ्यांना बेदम मारहाण केल्याचं आरोप करण्यात आलं आहे. या घटनेचे सीसीटीव्ही फुटेज पोलिसांकडे जमा करण्यात आले आहेत. तक्रारीनुसार सीसीटीव्ही फुटेजमध्ये मारहाण करणारा आरोपी प्रदीप देहाडे हा विद्यार्थ्यांच्या छातीवर पाय ठेवून त्यांना मारहाण करत असल्याचं दिसत आहे असे सांगण्यात आले आहे. या संपूर्ण प्रकरणात संबंधितांनी चिकलठाणा पोलीस ठाण्यात तक्रार दाखल केली असून, पोलिसांनी गुन्हा दाखल केला आहे. दरम्यान हा प्रकार समोर कसा आला आणि याबाबत सर्वात आधी प्रशासनाकडे तक्रार करणारे प्रतिम घंगाळे यांनी विद्यालय प्रशासनावर गंभीर आरोप केले आहेत. तसेच मुलांना होणाऱ्या मारहाणीसाठी जबाबदार देखील असल्याचा आरोप केला आहे.