وادیٔ گریز میں بجلی کا سنگین بحران — فیس دوگنی مگر اندھیرا برقرار گریز، 11 نومبر: وادیٔ گریز اس وقت شدید بجلی بحران کی لپیٹ میں ہے، جہاں عوام کے مطابق بجلی فیس میں دوگنا اضافہ کیے جانے کے باوجود بجلی کی فراہمی انتہائی ناقص ہے۔ علاقے کے لوگ روزمرہ زندگی میں شدید مشکلات کا سامنا کر رہے ہیں اور اندھیرے میں زندگی گزارنے پر مجبور ہیں。 میڈیا سے بات کرتے ہوئے ڈی ڈی سی تولیل، اعجاز راجہ نے کہا کہ “گریز میں بجلی کے بحران کی مکمل ذمہ داری موجودہ این سی حکومت پر عائد ہوتی ہے۔ عوام سے دوگنی فیس وصول کی جا رہی ہے مگر بجلی وقت پر فراہم نہیں کی جا رہی۔ لوگ گھپ اندھیرے میں زندگی گزارنے پر مجبور ہیں۔” انہوں نے مزید کہا کہ صرف بجلی ہی نہیں بلکہ تعلیم کا نظام بھی زبوں حالی کا شکار ہے۔ گریز کے متعدد تعلیمی اداروں میں اساتذہ اور لیکچررز کی اسامیاں خالی ہیں، جس کے باعث طلبہ کا تعلیمی مستقبل داؤ پر لگ گیا ہے۔ اعجاز راجہ نے الزام عائد کیا کہ “حکومتی دعوے صرف کاغذوں تک محدود ہیں، زمینی سطح پر کوئی عملی بہتری نظر نہیں آ رہی۔ ہمارا ایم ایل اے صرف فوٹو سیشنز میں مصروف ہے، جبکہ عوامی مسائل پر کوئی ٹھوس قدم نہیں اٹھایا جا رہا.” آخر میں ڈی ڈی سی تولیل نے حکومت سے مطالبہ کیا کہ گریز کے بجلی اور تعلیمی مسائل کے حل کے لیے فوری اور مؤثر اقدامات کیے جائیں تاکہ علاقے میں معمولاتِ زندگی بحال ہو سکیں۔