આખરે અનેક વિવાદ અને કોર્ટ પ્રક્રિયા બાદ શહેરના ભદ્ર પાથરણા બજારના દબાણો મામલે ઉકેલ આવ્યો છે. જે અંતર્ગત ગુજરાત હાઇકોર્ટના આદેશ બાદ અમદાવાદ મ્યુનિસિપલ કોર્પોરેશન દ્વારા ભદ્ર પાથરણા બજારના 944 જેટલા રજીસ્ટર ફેરિયાઓને ઢાલગરવાડ વિસ્તારમાં આવેલા amc ના બે જુદા જુદા પ્લોટમાં જગ્યા ફાળવી સમગ્ર ભદ્ર માર્કેટ ખાલી કરી દેવામાં આવ્યું હતું. નોંધનીય છે કે વર્ષોથી આ ભદ્ર માર્કેટમાં વિવિધ હાથલારી અને પાથરણા વાળા રોજીરોટી કમાવવા પોતાનો છૂટક ધંધો કરતા હતા. પણ સમયાંતરે આવા સ્ટોલ ધારકોની સંખ્યા વધી જતા રાજકીય અને વહીવટી વિવાદો સર્જાતા હતો. amc દ્વારા અનેકવાર દબાણ હટાવ કામગીરી કરાતી હોવા છતાં પાથરણા વાળા ત્યાં આવી જતા હતા. કેટલાય કિસ્સામાં amc સ્ટાફ અને પાથરણાવાળાઓ વચ્ચે બબાલ પણ થઇ છે. અનેક વખત આ મામલો કોર્ટ સુધી પણ પહોંચી ગયો હતો. આખરે ગુજરાત હાઇકોર્ટે amc એ કરેલી વ્યવસ્થા અને એફિડેવિટના અંતે પોતાનો ચુકાદો આપ્યો છે અને ભદ્ર માર્કેટ લોકોની અવરજવર માટે ખુલ્લું કરવાનો આદેશ આપ્યો. જેથી amc એ હવે અહીંયા કાયમી બોર્ડ લગાવી દીધા છે.